ພາສາລາວໄດ້ບັນຈຸ ເຂົ້າໃນລະບົບ ກູເກຼິນ (Lao language in Google) ເປັນພາສາທີ່ 65

      ບໍລິສັດ ກູເກຼິນ (Google) ແມ່ນຜູ້ໃຫ້ບໍລິການຊອກຫາຂໍ້ມູນ ແລະ ສະໜອງຂໍ້ມູນລະດັບໃຫຍ່ ໃນໂລກອິນເຕີເນັດ ທີ່ມີສະມາຊິກຜູ້ຊົມໃຊ້ຫລາຍຮ້ອຍລ້ານຄົນ. ນອກຈາກນັ້ນ ຍັງໃຫ້ບໍລິການ ລະບົບອີເມຣ ແລະ ລະບົບແຜນທີ່ແບບເອເລັກໂຕຼນິກຕາມພາບຖ່າຍຜ່ານດຽວທຽມ. ການບັນຈຸພາສາລາວເຂົ້າໃນລະບົບກູເກຼີນນັ້ນ ຈະເຮັດໃຫ້ມີການສ້າງຂໍ້ມູນຂ່າວສານທີ່ເປັນພາສາລາວຫລາຍຂື້ນ, ພ້ອມນັ້ນກໍ່ເຮັດໃຫ້ຄົນທີ່ນໍາໃຊ້ພາສາລາວ ບໍ່ວ່າຈະຢູ່ທີ່ໃດ ທີ່ມີການນໍາໃຊ້ອິນເຕີເນັດ ກໍ່ສາມາດສື່ສານພົວພັນກັນເປັນພາສາລາວໄດ້.

      ຍ້ອນເຫັນຄວາມສໍາຄັນກ່າວນັ້ນ, ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ກໍໄດ້ປະສານງານກັບບໍລິສັດກູເກຼີນ ນັບຕັ້ງແຕ່ຕົ້ນປີ 2012 ເປັນຕົ້ນມາ ແລະ ໄດ້ມີການດໍາເນີນການຄົ້ນຄ້ວາ ແລະ ສື່ສານແລກປ່ຽນຂໍ້ມູນນໍາກັນເພື່ອຈຸດປະສົງດັ່ງນີ້:

  1. ບັນຈຸ ຟອນ ຕົວອັກສອນລາວ ເພັດຊະລາດ (Phetsarath OT) ທີ່ເປັນຕົວອັກສອນ (ຟອນ) ທາງການຂອງ ສປປ ລາວ ເຂົ້າໃນລະບົບ ຟອນຂອງອິນເຕີເນັດ (Web-Font) ແລະ ສ້າງແປັ້ນພິມພາສາລາວ ແບບບໍ່ມີແປ້ນຈິງ (Lao Virtual Keyboard) ໃນລະບົບກູເກຼີນ (Google), ເຊິ່ງເຮັດໃຫ້ຜູ້ຊົມໃຊ້ ອິນເຕີເນັດ ສາມາດອ່ານ ແລະ ພີມ ພາສາລາວໄດ້ ໂດຍບໍ່ຈໍາເປັນຕ້ອງຕິດຕັ້ງ ຟອນເພັດຊະລາດ ໃນເຄື່ອງຄອມພິວເຕີ ກໍ່ຄືບັນດາເຄື່ອງອຸປະກອນ ເອເລັກໂຕຼນິກ (ລວມທັງ ມືຖື) ຂອງຕົນ.
  2. ສ້າງລະບົບການແປພາສາ ອັງກິດ - ລາວ - ອັງກິດ ໃນລະບົບກູເກີຼນ, ເຊິ່ງຜູ້ຊົມໃຊ້ ສາມາດຊອກການແປພາສາອັງກິດມາເປັນພາສາລາວໄດ້ ໂດຍຜ່ານແວບໃຊ ຂອງລະບົບກູເກຼີນ. ໂດຍວິຊາການ ຂອງ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ໄດ້ສ້າງວັດຈະນານຸກົມ ອັງກິດ-ລາວ-ອັງກິດ, ໄດ້ແປຄຳສັບອັງກິດມາເປັນພາສາລາວໃນລະບົບໂປຼແກຼມການແປ 71,400 ແຖວ ແລະ ປະໂຫຍກຂອງພາສາອັງກິດມາເປັນພາສາລາວ ໃນລະບົບຖານຂໍ້ມູນ ຈຳນວນ 6000 ປະໂຫຍກ. ບໍລິສັດກູເກີຼນ ໄດ້ເປິດການນໍາໃຊ້ ລະບົບການແປພາສາລາວ ຜ່ານແວບໃຊ ກູເກຼີນ ໃນວັນທີ່ 13/9/2012, ເຮັດໃຫ້ພາສາລາວເປັນພາສາ ທີ່ 65 ທີ່ສາມາດແປພາສາໃນລະບົບຂອງກູເກຼີນໄດ້. ນີ້ແມ່ນຜົນສໍາເລັດເບື້ອງຕົ້ນເທົ່ານັ້ນ ເພາະວ່າ ໃນປະຈຸບັນການແປຍັງແມ່ນແບບຄໍາຕໍ່ຄໍາ ຫຼື ຖ້າເປັນປະໂຫຍກ ກໍແມ່ນເປັນປະໂຫຍກທີ່ສັ້ນໆ ແລະ ຂຽນຕາມຫລັກໄວຍະກອນແບບງ່າຍ, ເຊິງ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ຍັງສຶບຕໍ່ປັບປຸງຮ່ວມກັບ ບໍລິສັດ ກູເກິຼນ ເພື່ອໃຫ້ພາສາລາວໃນລະບົບນີ້ ສົມບູນຂື້ນໄປເລື້ອຍໆ.
  3. ນອກຈາກນັ້ນ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ຍັງຈະຮ່ວມມືກັບ ບໍລິສັດ Google ໃນການສ້າງແຜນທີ່ ສປປ ລາວ ເປັນແບບພາບ 3 ມິຕິ ທີ່ເຫັນພາບເຄື່ອນເໜັງຕາມທິວທັດຖະໜົນ (Street View) ແລະ ບັນຈຸເຂົ້າໃນລະບົບ ກູເກີຼນເອີດ (Google Earth), ເຊິ່ງ ກູເກິຼນ ໄດ້ຖ່າຍພາບໃນແຕ່ລະວັນ ຜ່ານທາງດາວທຽມ.

      ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ມີຄວາມຍີນດີຮັບເອົາ ຄວາມຄິດເຫັນຕ່າງໆ ເພື່ອຈະໄດ້ມີການປັບປຸງ ໃຫ້ສົມບູນຂື້ນໄປເລື້ອຍໆ.